قبل ما تروح الاستاد انت مشجع فرفور ولا واحد مغمور؟

نسى اتحاد الكره المصرى قبل طبع تذاكر لقاء الجزائر المهم والمنتظر للجميع ان يضع بند على تذكره اللقاء بعنوان لايسمح الا بدخول الاغنياء والفرافير حتى يعرف الجميع انه لافائده من التجمهر والتظاهر حول منافذ البيع لانها ببساطه التذاكر فى خبر كان عند اصحاب المجاملات والمصالح عند الاصدقاء واصحاب المقام الرفيع فعلا انها ثقافه التنظيم التى يفتقدها رجال الاتحاد المصرى رجال البزنسس والمصالح
جماهير مصر الاحباء لاتغضبوا ولاتحزنوا فنحن سنشجع مصر بعيدا عن هؤلاء المرتزقه المتاجرون بفرحه المصريين الباخلون عليهم بابسط حقوقم وهل يعقل ان تنفذ التذاكر بعد طرحها للاسواق بنص ساعه وهل يعقل ايضا ان يصل سعرها الى عشر اضعاف سعرها الاصلى ؟

اقسم بالله العظيم انه الاستهتار والاستخفاف بعينه ولو كنت مسئولا لاعطيت اوامرى بان يفتح الاستاد بالمجان لانى اعرف وقتها ان المشجع الذاهب للاستاد هو المصرى البسيط المنتظر الفرحه من ابوتريكه ورفاقه لا من الفرافير القادرون على شراء التذاكر باعلى الاسعاروالذين يذهبون للاستاد للتصوير واكل الفشار والنزهه وتغير برنامج الفسح الاسبوعيه لهم فبدلا من دخول السينما اليوم نذهب للاستاد مش كده ياناس مش كده ياخلق مش توتى بتقول لميمى تعالى نروح الاستاد نتفرج على جيل شعر الحضرى وضحكه ابوتريكه وتسريحه ميدو الجديده والله هى دى الحقيقه بس احنا يوم السبت عايزيين جزره وعايزيين ريعو عايزين الخواجه وعايزيين محمد الميكانيكى العاشق للمنتخب عايزين احمد منعم المتطلع للفرحه عايزيين حليم يغنى ويرقص ويقول النصر لمصر عايزيين كل طبقات مصر الحالمين بحاجه تفرحهم والله يا جماعه احنا شعب غلبان وعنده استعداد يصوم اسبوع بس مصر تصعد وياريت فى النهايه كلامى يوصل ليهم علشان يتقوا ربنا فينا كجمهور بيحب مصر واعذرونى على استخدام لغتى العاميه فى مقالى لانه كلام طالع من القلب وطالع من مصرى حزين وغاضب ومش بيعرف يزوق كلام ولا يقول شعارات والنهايه بقول لاصحابى الفرافير متزعلوش من مقالى انا مش بحقد عليكم علشان انتم اغنياء بس عاوزكم تعرفوا ان لكل مباره ظروف ولقاء الجزائر ليس يومكم فقط بل يوم الجميع

اصدقائى واحبائى كل من يقراء مقالى ارجوكم شاركونى عرفونى انا صح ولا غلط وفى انتظار ارائكم بصدر رحب

» الحب من طرف واحد